ورى ماتعقل..!!

هالشعار اللي ياقربه لشعار برنامج مسابقات من طقة ستار اكاديمي هو شعار لجماعه اطلقت على نفسها جماعة احترم نفسك

طبعا هالجماعه مصريه وهي عباره عن شباب وبنات قرروا يسوون هالتنظيم عشان يوقفون عمليات التحرش والمغازل اللي يتعرضون له البنات

قبل يومين اصدرت محكمه مصريه حكم بالسجن ثلاث سنوات على شاب تحرش في بنت وغازلها ويعتبر هذا اول حكم بقضيه تعتبر الأولى من نوعها في مصر

السالفه ان بنت مصريه يقالها نهى وعمرها 27 سنه تعرض لها واحد مايخاف الله وتحرش فيها وغازلها عند باب بيتها ولاهمه احد .. ويوم ان البنت توهقت فيه وشافت انه صامل بدت تصايح وتستفزع بالعالم اللي حولها ولكن الكل مزلبها ولا احدن عبرها

والا والله يوم شاشت هالبنت وتنطقر وتمسك هالرجال وتتله مع علباه وتوديه لقسم الشرطه اللي حول حارتهم << وجع من اللي متحرش بالثاني

المهم الضابط يوم قالت له السالفه قال يابنت الحلال مالتس ومال المشاكل وانا ان شاء الله ابجلده لتس ومالتس الا اللي يوسع صدرتس بس طسي انتي ولاترفعين عليه شكوى

ويوم سمعت البنت حتسي الضابط والا والله يوم شاشت وتطقها ام العبيد وهي اللي راسها والف سيف ان مايردها الا المحكمه

والله وتشتكيه هالاسطى راعي الباص اللي تحرش فيها وغازلها ويوم حققوا معه ويصكونه بثلاث سنوات سجن مع الشوغل والنفاز << متأثر بالافلام المصريه

طبعا بعد هاللي صار انا ابصم بالعشره ان مصر بترتاح من المغازل وبناتهم بيهشون ذبان ولا احد مغازلهم وهم بالشوارع خخخخخخخخخخخخخخ ( وجه واحد تفكيره منتهي )

طيب فرضن لو سوينا مثل هالحركه وسوينا جمعيه وسمينها بدال احترم نفسك نخليها مثلا ورى ماتعقل .. يعني عشان مايقولون المصريين انكم مقلدينا << باللهي

لا صدق وسوينا مثل شعارهم ولصقناه بثيابنا يالعيال والبنات حطوه بعباياتهم وش تتوقعون بيصير؟

اتوقع الولد اذا شاف هالشعار على عباية البنت بيقول بسسسسسس البنت رايحه فيها وتلمح لي وشكلها خاقه علي .... وجع متى امداها تخق عليك ياللحجي

طيب لو بنت من بناتنا تعرض لها واحد ونشب لها وغازلها وسوت سواة المصريه وبلغت عليه واشتكته بالمحكمه وصكوه بسجن سنه والا سنتين والا ان شاء الله لو شهر بس اهم شي يسجنونه وبعدها كم بنت سوو نفس الشي وصار كل فتره نسمع ان فيه شاب تم سجنه لانه غازل بنت واشتكت عليه هل تتوقعين بيصير فيه ركود وكساد بعملية المغازل؟

من وجهة نظري اتوقع العيال بتطقهم الروعه ولافيه امل انه يتعرض لبنت ويغازلها الا يالله هي تلحقه وتترجاه انه يغازلها وتجيب ورقه فيها تعهد خطي منها انها مهيب مبلغه وتجيب ثنين شهود يشهدون بهالشي ويالله بيقتنع هالتمساح ويغازلها من الروعه اللي فيه

التمادي اللي صاير عندنا في عملية التحرش والمغازل ومضايقة هالبنات ماصار الا عشان اغلب هالبنات اذا نشب لها احد انطمت ومغصها بطنها وانحاشت وهو يلحقها ويستخف دمه وهي ساكته ياعزتي لها وتلف فيه من محل لمحل غديه يمل وينقلع بينما لو وقفت وطلبت فزعه من اللي حولها ومسكوه وسلموه للشرطه وقالت لولي امرها عن السالفه وخلته يرفع عليه قضيه وتتم محاكمته وصكوه بسجن كم شهر والا كم سنه كان عقلوا هالعالم وصارت البنت تمشي بحالها ولا ابن امه يتعرض لها الا عاد اللي مخربتها بلبسها في سوق والا بمكان عام فهذي والله ودك من يجلدها عشان تعقل

مسويين استفتاء بمصر بخصوص التحرش والمغازل وكان بهالشكل

سألنا الشباب رد فعلهم ايه لو شافو ولدبيتحرش ببنت

14 % منهم قال "ماليش دعوة "

34 % قال هتدخل لكن بشرط تكون محترمة !

20 % قال لو شكلها مش محترم هعاكس معاهم


سؤالي للبنات هل ممكن انك تسوين مثل هالمصريه وتكبرين السالفه وتوصلينها للمحاكم والا بتبلعين العافيه وتهاوشين شوي وبعدها تحطين رجلك وتنحاشين


صح ان مجتمعنا مايشجع انك تسوين مثل هالمصريه وان الطقه براسك بالاخير بس هل عندك استعداد تسوين هالشي

وانت يالشاب هل لو شفت واحد ناشب لبنت ويغازلها بيضيق صدرك وبتتخيل ان هالموقف صاير لاختك وبتروح تسفل بهالولد وتهاوشه وتسلمه للهيئه والا بتقول في ابليس هي واياه .. انا وش دخلني فيهم .. والا بتروح وتنشب لها وتغازلها بعد انت

لو فكرنا في اللي صار مع المصريه .. صح انها طلعت بوسائل الاعلام وكلن عرف انها تعرضت للتحرش والمغازل بس كسبت تعاطف كبير من الشعب هناك ويوم جابوا لقطات من المحكمه والا اغلبها بنات مالهم دخل جايين متعاطفين معها بس

قرارها انها تشتكيه بالمحكمه صعب طبعا وخصوصا انها بنت وهي عارفه ان وسائل الاعلام بتدخل بالسالفه كونها اول قضيه من هالنوع وطبعا البنت اي شي يأثر على سمعتها .. بس والله تعجبني باللي سوته


اترك لكم المايك للي يحب يضيف

لكم

ولا احد رد ولو حتى مجاملة


معناه ان الموضوع بايخ


يلعن ام التحطيم

على كذا ياقربة من سلة المهملات

راكـــــان


مشكور على الموضوووع مو أذأ أحد مارد معناه أن موضوعك فاااشل بالعكس يشرفني أن أكون أول من يرد عليك وأقولك الله يعطيك العافيه على الموضووع

تحياتي وتقديري لكـ

فتى الاحزان

ربي يعاافيك يالغالي

بس تعرف ماتعودنا المواضيع محدن يرد عليها

لحضوورك

احترامي

ههههههههه

لا موو بـــايخ

راكــــــــــــــــان

الله يعطيــــــــــــــك العاافيـــه

وتسلــم إيـــــــــــدك

لاعدمتـــــــــــك يـــارب


تحيتــي