ظميت يابير المعاني والافكار
اسقي ظما قلبي وطفي غليله
القلب فيه احزان والام واسرار
والروح من فرقى حبيبي عليله
انا صدمت بناس قلبي لهم بار
قدرتهم طول السنين الطويله
ناس لهم في القلب حشمة ومقدار
عديتهم مثل الغصون الظليله
من شأنهم سقت القدر صوب الاخطار
وحطيت رجلي في الدروب الهزيله
اسقيتهم دمع من العين مدرار
وضميتهم بين الضلوع النحيله
دافعت عنهم بالعزيمه والاصرار
وماذقت منهم غير طعم الفشيلة
خسرت قلبي لجلهم ناس اخيار
فارقت اعز انسان في حزن ليلة
ياحسرتي والقلب كنه على نار
حملت قلبي بالهموم الثقيلة
سألت نفسي والالم داخلي ثار
والحزن جاوبني وقلبي دليله
وشلون يرجع لي بعد كل ماصار
اللي فقدته رجعته مستحيله
رحل ولاجتني رسالة ولا اخبار
حتى حمام الوصل غايب هديله
معذور قلبه دون مايذكر اعذار
لنه ضيا سود العيون الكحيلة
اشتقت له شوق الروابي وللامطار
وشوق الخليل اللي مفارق خليله
ياقلب ياطيب تمسك بالاذكار
استغفر الرحمن واسلك سبيله
يكفيك كل اللي حملته من اوزار
لو يحمله صلب الجبل هد حيله
الحزن لو عصفور من داخلي طار
مل الحزن مني وقلبي يشيله
تكفين يابير المعاني والافكار
اسقي عطش قلبي وطفي غليله
خليني اصيغ القوافي والاشعار
واروي حنين القلب من سلسبيله
بـــيـــر الـــمــــعــــانــــي
